ភ្នំពេញ៖ អគ្គស្នងការរង និងជាស្នងការនគរបាលរាជធានីភ្នំពេញ លោក ស ថេត បានបញ្ជាទៅស្នងការរងទទួលផែនចរាចរណ៍ផ្លូវធ្វើការណែនាំអប់រំដល់នគរបាលចរាចរណ៍ឲ្យបានត្រឹមត្រូវ។

ក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ រក្សាសន្តិសុខ សណ្តាប់ធ្នាប់សង្គមឆ្នាំ២០២២ និងទិសដៅការងារសម្រាប់ឆ្នាំ២០២៣ នៅថ្ងៃទី៣១ ខែមីនា ឆ្នាំ២០២៣ ឧត្តមសេនីយ៍ឯក ស ថេត បានប្រាប់ដល់លោកស្នងការរងទទួលផែនចរាចរណ៍ផ្លូវ ឲ្យយកចិត្តទុកដាក់ខ្ពស់លើការណែនាំអប់រំដល់មន្ត្រីអនុវត្តច្បាប់ឱ្យរៀនចេះប្រើប្រាស់កាយវិការ និងពាក្យសំដីឲ្យបានសមរម្យជាមួយប្រជាពលរដ្ឋ។

ការលើកឡើងរបស់លោកស្នងការនគរបាលរាជធានីភ្នំពេញនៅពេលនេះគឺបន្ទាប់ពីមានព័ត៌មានជាច្រើនទាក់ទងនឹងនគរបាលចរាចរណ៍រាជធានីភ្នំពេញពាក់ព័ន្ធនឹងការប្រើប្រាស់ពាក្យសំដីមិនសមរម្យលើពលរដ្ឋ ការចុះដកសោរម៉ូតូពីពលរដ្ឋរួចឱ្យពលរដ្ឋទៅនិយាយគ្នា និងមានការចោទប្រកាន់មួយចំនួនទៀតទាក់ទងនឹងការចោទថាពលរដ្ឋជិះឡានប្រើប្រាស់ឯកសារក្លែងក្លាយជាដើម៕